ਸਾਂਸਦਾਂ ਵੱਲੋਂ ਨਿੱਜੀ ਹਮਲਿਆਂ ਅਤੇ ਨਸਲੀ ਟਿੱਪਣੀਆਂ ਦਾ ਦੌਰ, ਹਰ ਪਾਸੇ ਹੋ ਰਹੀ ਸਖ਼ਤ ਨਿਖੇਧੀੇ
-ਮਹਿਲਾ ਵਿੱਤ ਮੰਤਰੀ ਉਤੇ ਵੀ ਟਿਪਣੀ….ਫਿਰ ਮੰਗਣੀ ਪਈ ਮੁਆਫ਼ੀ
ਔਕਲੈਂਡ, 23 ਅਪ੍ਰੈਲ, 2026: –ਨਿਊਜ਼ੀਲੈਂਡ ਦੀ ਸਿਆਸਤ ਵਿੱਚ ਵਿਵਾਦਾਂ ਦਾ ਹੜ੍ਹ ਆਇਆ ਹੋਇਆ ਹੈ। ਚਾਰੇ ਪਾਸੇ ਨਿੱਜੀ ਟਿੱਪਣੀਆਂ ਅਤੇ ਨਸਲੀ ਵਿਤਕਰੇ ਦੀਆਂ ਘਟਨਾਵਾਂ ਦੀ ਸਖ਼ਤ ਨਿਖੇਧੀ ਹੋ ਰਹੀ ਹੈ। ਹਾਲ ਹੀ ਦੇ ਦਿਨਾਂ ਵਿੱਚ ਨਿਊਜ਼ੀਲੈਂਡ ਦੇ ਸਿਆਸੀ ਗਲਿਆਰਿਆਂ ਵਿੱਚ ਨਿੱਜੀ ਹਮਲਿਆਂ ਅਤੇ ਨਸਲੀ ਟਿੱਪਣੀਆਂ ਕਾਰਨ ਮਾਹੌਲ ਕਾਫੀ ਗਰਮਾ ਗਿਆ ਹੈ। ਡਿਪਟੀ ਲੀਡਰ ਸ਼ੇਨ ਜੋਨਸ ਵੱਲੋਂ ਵਿੱਤ ਮੰਤਰੀ ਨਿਕੋਲਾ ਵਿਲਿਸ ਬਾਰੇ ਕੀਤੀ ਗਈ ਨਿੱਜੀ ਟਿੱਪਣੀ ਅਤੇ ਹੋਰ ਮੈਂਬਰਾਂ ਨਾਲ ਹੋਏ ਨਸਲੀ ਵਿਤਕਰੇ ਨੇ ਦੇਸ਼ ਭਰ ਵਿੱਚ ਇੱਕ ਨਵੀਂ ਚਰਚਾ ਛੇੜ ਦਿੱਤੀ ਹੈ।
ਸ਼ੇਨ ਜੋਨਸ ਵੱਲੋਂ ਨਿਕੋਲਾ ਵਿਲਿਸ ਦੀ ਸਿਹਤ ’ਤੇ ਨਿੱਜੀ ਟਿੱਪਣੀ ਅਤੇ ਮੁਆਫ਼ੀ
ਨਿਊਜ਼ੀਲੈਂਡ ਫਰਸਟ ਦੇ ਡਿਪਟੀ ਲੀਡਰ ਸ਼ੇਨ ਜੋਨਸ ਅਤੇ ਵਿੱਤ ਮੰਤਰੀ ਨਿਕੋਲਾ ਵਿਲਿਸ ਵਿਚਕਾਰ ਵਧ ਰਹੀ ਸਿਆਸੀ ਖਿੱਚੋਤਾਣ ਉਸ ਵੇਲੇ ਇੱਕ ਵਿਵਾਦਤ ਮੋੜ ਲੈ ਗਈ, ਜਦੋਂ ਜੋਨਸ ਨੇ ਵਿਲਿਸ ਦੀ ਸਰੀਰਕ ਦਿੱਖ ’ਤੇ ਸਿੱਧਾ ਹਮਲਾ ਕੀਤਾ। ਜਦੋਂ ਉਹਨਾਂ ਤੋਂ ਸਿਆਸੀ ਗੱਠਜੋੜ ਬਾਰੇ ਸਵਾਲ ਪੁੱਛਿਆ ਗਿਆ, ਤਾਂ ਉਹਨਾਂ ਨੇ ਕਿਹਾ, ਸ਼ਾਇਦ ਇਹ ਬਹੁਤ ਜ਼ਿਆਦਾ ਭਾਰ ਘਟਾਉਣ ਦਾ ਨਤੀਜਾ ਹੈ। ਇਸ ਟਿੱਪਣੀ ਤੋਂ ਬਾਅਦ ਪਾਰਟੀ ਲੀਡਰ ਵਿੰਸਟਨ ਪੀਟਰਸ ਨੇ ਇਸ ਨੂੰ ‘ਨਾ-ਮਨਜ਼ੂਰਯੋਗ’ ਦੱਸਿਆ। ਜੋਨਸ ਨੇ ਆਪਣੀ ਗਲਤੀ ਮੰਨਦਿਆਂ ਜਨਤਕ ਤੌਰ ’ਤੇ ਮੁਆਫ਼ੀ ਮੰਗੀ ਅਤੇ ਕਿਹਾ ਕਿ ਉਹ ਭਵਿੱਖ ਵਿੱਚ ਅਜਿਹੇ ਦੁਖਦਾਈ ਸ਼ਬਦਾਂ ਦੀ ਵਰਤੋਂ ਨਹੀਂ ਕਰਨਗੇ। ਨਿਕੋਲਾ ਵਿਲਿਸ ਨੇ ਇਸ ਮੁਆਫ਼ੀ ਨੂੰ ਸਵੀਕਾਰ ਕਰ ਲਿਆ ਹੈ।
ਜੋਨਸ ਨੇ ਅਸਲ ਵਿੱਚ ਕੀ ਕਿਹਾ?
ਵੀਰਵਾਰ ਨੂੰ ਇੱਕ ਪ੍ਰੈੱਸ ਕਾਨਫਰੰਸ ਦੌਰਾਨ ਜਦੋਂ ਪੱਤਰਕਾਰਾਂ ਨੇ ਜੋਨਸ ਤੋਂ ਨੈਸ਼ਨਲ ਪਾਰਟੀ ਦੀਆਂ ਪੁਰਾਣੀਆਂ ਗੱਲਾਂ (2017 ਵਿੱਚ ਲੇਬਰ ਨਾਲ ਜਾਣ ਬਾਰੇ) ਅਤੇ ਨਿਕੋਲਾ ਵਿਲਿਸ ਦੇ ਬਿਆਨਾਂ ’ਤੇ ਸਵਾਲ ਪੁੱਛੇ, ਤਾਂ ਉਹਨਾਂ ਨੇ ਤਿੱਖੀ ਪ੍ਰਤੀਕਿਰਿਆ ਦਿੱਤੀ। ਜੋਨਸ ਨੇ ਕਿਹਾ: ਇਹ ਰਾਜਨੀਤੀ ਦਾ ਉਤਰਾਅ-ਚੜ੍ਹਾਅ ਹੈ (Bump and Grind) … ਮੈਨੂੰ ਨਹੀਂ ਪਤਾ, ਸ਼ਾਇਦ ਇਹ ਬਹੁਤ ਜ਼ਿਆਦਾ ਭਾਰ ਘਟਾਉਣ ਦਾ ਨਤੀਜਾ ਹੈ। ਇਹ ਟਿੱਪਣੀ ਸਿੱਧੇ ਤੌਰ ’ਤੇ ਨਿਕੋਲਾ ਵਿਲਿਸ ਦੇ ਭਾਰ ਘਟਣ (Weight loss) ਵੱਲ ਇਸ਼ਾਰਾ ਸੀ, ਜਿਸ ਨੂੰ ਸੰਸਦ ਵਿੱਚ ਬਹੁਤ ਹੀ ਮਾੜੇ ਪੱਧਰ ਦੀ ਰਾਜਨੀਤੀ ਵਜੋਂ ਦੇਖਿਆ ਗਿਆ।
ਨਸਲੀ ਵਿਤਕਰੇ ਦੀ ਸਖ਼ਤ ਨਿਖੇਧੀ: ‘ਬਟਰ ਚਿਕਨ ਸੁਨਾਮੀ’ ਅਤੇ ਹਾਕਾ ਵਿਵਾਦ
ਸਿਆਸਤ ਵਿੱਚ ਨਿੱਜੀ ਹਮਲਿਆਂ ਦੇ ਨਾਲ-ਨਾਲ ਨਸਲੀ ਟਿੱਪਣੀਆਂ ਦਾ ਮੁੱਦਾ ਵੀ ਭਖਿਆ ਹੋਇਆ ਹੈ। ਭਾਰਤੀ ਭਾਈਚਾਰੇ ਵਿਰੁੱਧ ਵਰਤੀ ਗਈ ‘ਬਟਰ ਚਿਕਨ ਸੁਨਾਮੀ’ ਵਰਗੀ ਭਾਸ਼ਾ ਦੀ ਚਾਰੇ ਪਾਸੇ ਨਿਖੇਧੀ ਕੀਤੀ ਜਾ ਰਹੀ ਹੈ। ਅਜਿਹੀਆਂ ਟਿੱਪਣੀਆਂ ਨਾ ਸਿਰਫ ਅਪਮਾਨਜਨਕ ਹਨ, ਸਗੋਂ ਸਮਾਜਿਕ ਭਾਈਚਾਰੇ ਨੂੰ ਵੀ ਨੁਕਸਾਨ ਪਹੁੰਚਾਉਂਦੀਆਂ ਹਨ।
ਇਸ ਦੇ ਨਾਲ ਹੀ, ਸੰਸਦ ਮੈਂਬਰ ਪਰਮਜੀਤ ਪਰਮਾਰ ਵਿਰੁੱਧ ਹਾਕਾ (8aka) ਦੌਰਾਨ ਕੀਤੀ ਗਈ ਕਥਿਤ ਨਸਲੀ ਵਿਵਹਾਰ ਦੀ ਘਟਨਾ ਨੇ ਸਭ ਨੂੰ ਹੈਰਾਨ ਕਰ ਦਿੱਤਾ ਹੈ। ਕਿਸੇ ਸਾਂਸਦ ਦੇ ਸੱਭਿਆਚਾਰਕ ਪਿਛੋਕੜ ਜਾਂ ਉਹਨਾਂ ਦੀ ਪਛਾਣ ਨੂੰ ਨਿਸ਼ਾਨਾ ਬਣਾਉਣਾ ਲੋਕਤੰਤਰ ਦੀਆਂ ਕਦਰਾਂ-ਕੀਮਤਾਂ ਦੇ ਵਿਰੁੱਧ ਹੈ।
ਸਿਆਸੀ ਆਗੂਆਂ ਦਾ ਸਖ਼ਤ ਰੁਖ: ਨਿੱਜੀ ਹਮਲਿਆਂ ਦੀ ਕੋਈ ਥਾਂ ਨਹੀਂ
ਲੇਬਰ ਲੀਡਰ ਕ੍ਰਿਸ ਹਿਪਕਿਨਜ਼ ਵੱਲੋਂ ਵੀ ਨਿਕੋਲਾ ਵਿਲਿਸ ਬਾਰੇ ‘ਮੈਡੀਕਲ ਮਦਦ’ ਲੈਣ ਵਰਗੀ ਟਿੱਪਣੀ ਕੀਤੀ ਗਈ ਸੀ, ਜਿਸ ’ਤੇ ਵਿਲਿਸ ਨੇ ਸਖ਼ਤ ਇਤਰਾਜ਼ ਜਤਾਇਆ। ਵਿਲਿਸ ਨੇ ਸਪੱਸ਼ਟ ਕੀਤਾ ਕਿ ਉਹ ਪੂਰੀ ਤਰ੍ਹਾਂ ਸਿਹਤਮੰਦ ਹਨ ਅਤੇ ਅਜਿਹੀਆਂ ਟਿੱਪਣੀਆਂ ਸਿਆਸਤ ਦੇ ਪੱਧਰ ਨੂੰ ਗਿਰਾਉਂਦੀਆਂ ਹਨ। ਹਿਪਕਿਨਜ਼ ਨੇ ਵੀ ਬਾਅਦ ਵਿੱਚ ਨਿੱਜੀ ਤੌਰ ’ਤੇ ਮੁਆਫ਼ੀ ਮੰਗ ਲਈ ਹੈ।
ਨਿਊਜ਼ੀਲੈਂਡ ਵਾਸੀਆਂ ਅਤੇ ਵੱਖ-ਵੱਖ ਜਥੇਬੰਦੀਆਂ ਵੱਲੋਂ ਇਹ ਮੰਗ ਕੀਤੀ ਜਾ ਰਹੀ ਹੈ ਕਿ ਸਿਆਸਤਦਾਨਾਂ ਨੂੰ ਆਪਣੀ ਭਾਸ਼ਾ ਅਤੇ ਰਵੱਈਏ ਵਿੱਚ ਮਰਯਾਦਾ ਬਣਾਈ ਰੱਖਣੀ ਚਾਹੀਦੀ ਹੈ। ਕਿਸੇ ਦੀ ਸਰੀਰਕ ਦਿੱਖ, ਸਿਹਤ ਜਾਂ ਨਸਲੀ ਪਛਾਣ ’ਤੇ ਹਮਲਾ ਕਰਨਾ ਸੱਭਿਅਕ ਸਮਾਜ ਵਿੱਚ ਸਵੀਕਾਰ ਨਹੀਂ ਕੀਤਾ ਜਾ ਸਕਦਾ।